Recomendacións Nadal

Charla científica: As orixes de Ourense

Rematamos este trimestre de moita ciencia na Biblioteca na compaña de J.María Eguileta, arqueólogo municipal do Concello de Ourense, que nos explicará o estado da cuestión das orixes de Ourense. 

Como xa temos traballado dende distintas perspectivas, o coñecemento científico non é estático senón que se vai construíndo segundo avanza a investigación. 

O que sabemos sobre os alicerces da nosa cidade foi medrando nos últimos anos, grazas a novos achádegos que proporcionaron datos importantes, despois do seu estudo. E o espazo que ocupa o noso centro é un dos que proporcionou nova información. Agardamos o que nos conte unha persoa que traballou nesta investigación e que ademais é un grande divulgador, como nos demostra, por exemplo, nos artigos que cada sábado publica na prensa.

E ademais, podedes consultar este libro na nosa biblioteca.

Visita á Biblioteca Nós de Ourense

Un grupo de 3º da ESO visitou a biblioteca provincial Nós. 

Recordamos que o noso centro foi sede da biblioteca provincial ata que un incendio en 1927 destruíu parte dos seus fondos e do edificio. Dende aquela ata hoxe, a biblioteca percorreu varios lugares, ata asentarse nun edificio exclusivo, deseñado especificamente para esa fin. 

Percorremos todos os recunchos, recibimos explicacións das moitas posibilidades que nos ofrece, e incluso as persoas que non o tiñan, saíron co carné feito!

Agardamos que a partir de agora, este magnífico lugar e todos os tesouros que garda pasen a ser un dos destinos favoritos do noso alumnado.

Aproveitamos para coñecer o magnífico Claustro de S. Francisco e a sala da Escolma de Escultura do Museo Arqueolóxico.

Grazas ás persoas que nos guiaron e amenizaron a nosa visita!

Algunhas novidades

 

Premios Xerais de Novela

 Dúas grandes mulleres gañan os tres premios deste ano:

Ledicia Costas: premio MERLÍN, de literatura infantil pola obra O neno do lume, a fascinante historia de Morgan, un neno que, cando era un bebé, apareceu dentro dunha cesta xunto cunha enigmática nota: "Lédeme máis alá da néboa e búsquen na casa das tres irmáns e díganlle que son o neno do lume"

Berta Dávila: premio JULES VERNE, de literatura xuvenil, pola obra Un elefante na sala de estar, o relato que parte dun grupo de persoas que se ven afectadas por un suicidio intenta buscar o motivo ó tempo que se culpan e procuran o xeito de aceptalo... Diferentes voces, orixinalidade, sentimentos, contradicións, xiro final sorprendente.

Berta Dávila: premio XERAIS de novela, pola obra Os seres queridos, unha reflexión sobre a alienación, novela incómoda sobre a negación da muller como persoa dende o momento en que se converte en nai. As arestas controvertidas da maternidade, sensacións de culpa e arrepentimento, reflexións sobre a creación literaria, prosa precisa e emotiva...

Recordo a Darío Xoan Cabana, gañador en dúas ocasións, e ás súas palabras: "A literatura, a poesía, é a forma máis alta e depurada que asume a lingua".

Paga a pena ver o video da entrega de premios. Fermosísimas palabras de libros, imaxinación, contos, calidoscopios, fadas, recordos, golpes de luz, inventos marabillosos...

Agardamos con ansia que sexan publicadas!

25N na biblioteca do IES Otero Pedrayo. Saímos na tele

 

In memoriam

 Inauguramos este apartado cun home e unha muller moi recoñecidos na literatura galega e española:

Darío Xoán Cabana e Almudena Grandes. Ambos faleceron neste mes de novembro. 

Na nosa biblioteca temos algunhas das súas obras máis recoñecidas. E queremos adicarlle a nosa lembranza.